“Eale eatnamis eatnan láhkái” Diiddaid ja sátnevádjasiid girjáivuohta sámi njálmmálaš árbevierus

Abstract

Dán dutkamušas lean čađahan konteaksta- ja fáddáguorahallama dihto diidafearániin ja sátnevádjasiin. Váldomihttu dutkamušas lea guorahallat ahte movt diidafearániin ja sátnevádjasiin bohtet sámi máilmmigovat ovdan, ja movt diidafearániid fáttát sáhttet čujuhit diiddaide. Dutkamuššii lean válljen teoriijaid nugo álgoálbmotmetodologiija, kulturipmárdusa, sámi gulahallanvugiid ja sámi estetihka vuođđun, mat láidestit ja nannejit dán guorahallama sámi- ja álgoálbmotmetodologiija eavttuid vuođul. Sámi njálmmálaš árbevierru lea sihke hábmen ja láidestan otná sámi girjjálašvuođa, ja dutkamušas meannudan movt diiddaid, fearánat ja sátnevádjasat leat oassin sámi girjjálašvuođas. Dán dutkamušas lean jearahallan vihtta olbmo Guovdageainnu guovllus, kvalitatiivvalaš jearahallanvuogi eavttuiguin. Jearahallamiid vuođul lean guorahallan guokte diidafearána ja golbma sátnevádjasa, main earenoamážit geahčadan konteavstta ja fáttá. Lean dutkanmetodan atnán sihke narratologiija- ja lyrihkkaguorahallanvuogi, go guorahalan dutkamuša ávdnasiid.