Duohta ja fantasiija máilbmi sámi njálmmálaš árbbis girjjálašvuođa prosatekstii. Narratologalaš guorahallan Ilmmiid gaskkas románas.

Abstract

Ilmmiid gaskkas lea gelddolaš fantasyromána, man Guovdageaidnulaš Máret Anne Sara lea čállán. Romána muitalusa dáhpáhusat dáhpáhuvvet duohta máilmmis ja fantasiija máilmmis, go váldopersovnnat geavvaba ilmmiid gaskii. Guorahalan movt njálmmálaš árbevierru adno materiálan romána muitalusas, ja movt materiála lea mielde duddjomin muitalusa ealasin. Lean guorahallan teavstta sihke oarjemáilmmi- ja eamiálbmotmetodologiijain, dainna lágiin geahččalan heivehit guovtti máilmmi kultuvrra, máilmmioainnu, jurddašanvuogi, árbbi ja árvvuid. Ávkkástalan iežan kultuvrralaš, gielalaš ja sosiála máhtu teavstta lahkoneamis. Lean atnán luohteteoriija vuođđun guorahallamis, go lean guorahallan movt persovnnat birgejit ja gulahallet ilmmiid gaskkas. Guorahallamis lean guorahallan persovnnaid narratologalaš teoriija vuođul, ja luohteteoriija vuođul. Narratologiija teoriija vuođul lean guorahalan movt dutkanmateriála muitalanvuohki ja njálmmálaš muitalanárbi váikkuhit muitalusa gealddu ja lohkki beroštumi lohkat. Teakstaanalyhtalaš guorahallamis guorahalan teavstta iešguđet osiid ja movt dát doibmet muitalusas ja makkár mearkkašumiid dat addet tekstii. Guorahalan muitalanvugiid, gulahallanvugiid, persovnnaid ja birrasa. Ilmmiid gaskkas romána muitalusas leat persovnnat guovddážis hervemen muitalusa, geahčadan persovnnaid siskkáldas ja olgguldas iešvuođaid. Dialogaid bokte ihtet persovnnaid iešvuođat, gaskavuođat ja dagut, dat addet mearkkašumi tekstii ja duođaštit goalmmátpersovnna muitaleaddjin. Romána muitalus lea čadnon sámi njálmmálaš muitalanárbevirrui, mii lea rámma romána dáhpáhusaide otná servodagas. Duohta- ja fantasiijadáhpáhusain romána muitalusas čuožžilit gažaldagat movt ođđaáigásaš eallinvuohki váikkuha boazodoalu ceavzilvuođa. Mii lea duohta ja mii lea hutkojuvvon báhcá lohkki dulkojupmin.