Who governs our stories? The collected material of the Norwegian truth and reconciliation commission

Abstract

Mii bidjat fuomášumi movt čohkkejuvvon muitalusat ja vásáhusat stivrejuvvojit Norgga Duohtavuohta -ja soabahankommišuvnna (Truth and Reconciliation Commission, TRC) bealis. Dat leat sirdojuvvon nationála arkiivvaide. Nu movt Norgga Stuoradiggi lea cealkán, de galget jearahallamat boahtteáiggis geavahuvvot dutkamušaide. Duohtavuohta- ja soabahankommišuvnna mandáhta bokte galggai kommišuvdna ráhkadit rávvagiid movt ođđasit geavahit materiála. Seammás go materiála geavaheapmi lea dehálaš, de láktasit ođđa geavaheapmái hástalusat, sihke ehtalaččat ja stivrema ektui. Dutkkadettiin dokumeanttaid gullevaččat Duohtavuohta -ja soabahankommišuvnna materiálameannudeapmái, masa maid gullet rávvagat movt dáhtaid olahit, mii digaštallat kvaliteahta ja etihka beliid das go jearahallamat ođđasit geavahuvvojit, ja maiddái daid oamasteami ja olaheami. Digaštallama rámma leat CARE prinsihpat gullevaččat álgoálbmogiid dáhtaid stivremii ja fuomášumi etihkalaš beliide mat gusket jearahallojuvvon olbmuid vuoigatvuođaide oažžut diehtit movt jearahallanmateriála geavahuvvo ja dulkojuvvo ođđasit boahttevaš dutkamušain, ja sámiid oassálastin hábmemii ja meannudeapmái go rávvagiid galgá čuovvulit dáhtáid olaheami, oamasteami ja stivrema ektui. Dokumeanttat eai sisttisdoala dieđuid dan birra ahte muitalusat ja vásáhusat leat ain olámuttus dutkiide vaikko muitaleaddjit geasset iežaset muitalusaid ja vásáhusaid eret almmolašvuođas. Mii eat ge gávdnan dieđuid das makkár vuoigatvuohta muitaleddjiin lea diehtit movt sin muitalusat ja vásáhusat bohtet geavahuvvot dutkamušain. Min guorahallan čájeha ahte lea dárbu dárkkistit dálá rávvagiid olaheami ektui nannen dihte guovddášelemeanttaid dutkanetihkas ja álgoálbmogiid oassálastima dáhtaid stivremis.