Vurdering av naturvitskapleg prosess og metode på ungdomstrinnet. Ein kvalitativ studie av elevar si oppfatning og gjennomføring av utforskande oppgåver relatert til naturfaget sin prosessdimensjon.

Abstract

Utforskande arbeidsmåtar er eit resultat av naturvitskapleg tradisjon, og synleggjer naturfaget sin prosessdimensjon. Føremålet med studien var utvikling og pilotering av ei fagprøve i naturfag på 8.trinn. Dette gav opphav til problemstillinga: "På kva måte gjennomfører og opplever elevar på ungdomstrinnet utforskande oppgåver som stiller krav til naturvitskapleg prosess?" Studien ønska samt å undersøkje læraren sin vurderingspraksis i faget. Studien er tilknytta forskingsprosjektet LISSI.

Mastergradsoppgåva byggjer på scientific literacy, nature of science og utforskande arbeidsmåtar i naturfag. Dette er ein kvalitativ studie med ei fenomenologisk tilnærming. Det vart gjennomført ei metodetriangulering med ulike datainnsamlingsmetodar som pilotering av fagprøve, semistrukturert intervju og dokumentanalyse av naturfagsprøver. Tre klasser og ein lærar deltok i studien.

Studien gir viktige funn for praksisfeltet i arbeid med vurdering av «forskerspirekunnskap». I studien viser det seg at særleg to kompetansar er utfordrande for elevane; å vurdere og planlegge naturvitskaplege undersøkingar, og å tolke data og evidens på ein naturvitskapleg måte. Studien viser at elevane har manglande kunnskap om epistemologi, om særtrekk ved naturvitskap og om korleis naturvitskapleg kunnskap vert til. Funn frå læraren viser at han i liten grad implementerar prosessaspektet i vurdering. Naturfagslæraren held fast ved eit tradisjonelt prøveformat med testing av primært innhaldskunnskap.