Kvinner i sovjetisk og russisk krigsfilm - offer og moralske førebilete

Abstract

Oppgåva undersøker korleis kvinnelege soldatar vert framstilt i filmane A zori zdes’ tikhie (Rostotskij 1972) og Leningrad (Buravskij 2007). Om lag ein million kvinner tenestegjorde i dei sovjetiske styrkane under andre verdskrigen. Kvinners krigsdeltaking gjekk langt utover dei tradisjonelle kvinneoppgåvene som helsepersonell og innom administrasjon: Kvinnelege soldatar var skarpskyttarar, pilotar, bemanna maskingevær, luftvernkanoner og panservogner for å nemne noko. Krigen er eit viktig felles minne og traume, og filmar frå denne perioden når gjerne eit breitt publikum. Eit interessant spørsmål blir korleis dialogen mellom filmskapar og publikum kring den kvinnelege krigsdeltakinga er. Oppgåva gjeng inn i to filmar om andre verdskrigen som har kvinnelege soldatar som hovudroller og ser på bodskapen som vert formidla gjennom desse kvinnene. Ved å velje ut ein film frå 1970-talet og ein frå 2000-talet får ein høve til å sjå på brot og kontinuitet i framstillinga av kvinnelege soldatar, men det gjev òg meir overordna perspektiv på kvinnerolla generelt i Russland og Sovjetsamveldet. Forutan kvinneroller i Russland og kvinnelege soldatar drøftar oppgåva tema som historie på film, sovjetisk og post-sovjetisk kultur, og film retta mot ei breitt publikum.