Peter og petroleum

Abstract

Denne oppgåva tek for seg korleis olja, med sine ringverknader har påvirka kristendom i Stavanger. Gjennom religionssosiologiske briller ser eg først på den moderne historia i Stavanger. Med denne gjennomgangen som grunnlag går eg vidare inn på Weber sine teoriar i Den protestantiske etikk og kapitalismens ånd for å sjå om teoriane i verket kan kasta lys på forhaldet mellom religion og økonomisk tenking i Stavanger. Her vil særleg Hauge-rørsla i Stavanger handsamast. I den neste delen av oppgåva går eg kvantitativt og komparativt til verks, der eg ser på tre primærkjelder med om lag 20 års mellomrom, for å spora religiøse endringar i Stavanger dei siste 50 åra. Av dei mest sentrale funna eg trekk fram, er at den religiøse aktiviteten har gått ned, parallelt med at dei tradisjonelle pietistiske verdiane er svekka i Stavanger dei siste 50 åra. Dessutan viste ein av rapportane at informantar tilknytta oljesektoren var mindre religiøst aktive enn resten av befolkninga i Stavanger. Desse funna drøftar eg særleg opp mot fem sekulariseringsteoriar, der urbanisering og auke i materiell levestandard avteiknar seg som dei sterkaste i Stavanger. Gjennom det ein kan omtala som «petrolisering» har desse moderniserande og sekulariserande kreftene virka ekstra konsentrert i Stavanger.